ଲକ୍ଷ୍ନୌ : ଉତ୍ତରପ୍ରଦେଶରେ ୨୦୨୭ ବିଧାନସଭା ନିର୍ବାଚନ ପାଇଁ ଏବେଠାରୁ ବିଭିନ୍ନ ରାଜନୈତିକ ଦଳମାନେ ପ୍ରସ୍ତୁତି ଆରମ୍ଭ କରିଛନ୍ତି। ସମାଜବାଦୀ ପାର୍ଟି ଓ କଂଗ୍ରେସ ନିଜ ନିଜ ଭୋଟ ସମୀକରଣକୁ ମଜଭୁତ କରିବାକୁ ଉଦ୍ୟମ କରୁଥିବା ବେଳେ, ବିଜେପିର ନଜର ମୁସଲିମ ଭୋଟ ଉପରେ ରହିଛି।ବିଶେଷ କରି ପଶ୍ଚିମ ଉତ୍ତରପ୍ରଦେଶରେ ମୁସଲିମ ଭୋଟରଙ୍କୁ ନିଜ ପକ୍ଷକୁ ଆଣିବା ପାଇଁ ଦଳ ନୂଆ ରଣନୀତି ଆପଣାଇଛି। ବିଜେପିର ନୂଆ ଜାତୀୟ ସଂଗଠନରେ ଉତ୍ତରପ୍ରଦେଶର ଦୁଇ ମୁସଲିମ ଚେହେରା ତାରିକ ମନସୁର ଓ କୁଁବର ବାସିତ ଅଲୀଙ୍କୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିଛି। ତାରିକ ମନସୁରଙ୍କୁ ଲଗାତାର ଦ୍ୱିତୀୟଥର ପାଇଁ ଜାତୀୟ ଉପାଧ୍ୟକ୍ଷ କରାଯାଇଥିବା ବେଳେ, କୁଁବର ବାସିତ ଅଲୀଙ୍କୁ ପଦୋନ୍ନତି ଦେଇ ବିଜେପି ସଂଖ୍ୟାଲଘୁ ମୋର୍ଚ୍ଚାର ଜାତୀୟ ଅଧ୍ୟକ୍ଷ ଦାୟିତ୍ୱ ଦେଇଛି। ଦୁଇ ନେତାଙ୍କର ରାଜନୈତିକ ପୃଷ୍ଠଭୂମି ଭିନ୍ନ। କୁଁବର ବାସିତ ଅଲୀ ମେରଟରୁ ଆସିଥିବା ମୁସଲିମ ରାଜପୁତ ନେତା ଏବଂ ସେ ତୃଣମୂଳ ସ୍ତରରୁ ବିଜେପି ସଂଗଠନରେ ନିଜ ସ୍ଥାନ ମଜଭୁତ କରିଛନ୍ତି।
ଅନ୍ୟପଟେ ତାରିକ ମନସୁର ଅଲୀଗଡ଼ ମୁସଲିମ ବିଶ୍ୱବିଦ୍ୟାଳୟର କୁଳପତି ପଦରୁ ଅବସର ନେବା ପରେ ରାଜନୀତିକୁ ଆସିଥିଲେ। ସେ କୁରୈଶୀ ସମାଜରୁ ଆସିଥିବା ନେତା। ବିଜେପିର ଏହି ରଣନୀତି ପଛରେ ପଶ୍ଚିମ ଉତ୍ତରପ୍ରଦେଶର ମୁସଲିମ ଭୋଟ ସମୀକରଣ ଏକ ବଡ଼ କାରଣ ବୋଲି ରାଜନୈତିକ ଚର୍ଚ୍ଚା ହେଉଛି। ଦଳ ଅଶରାଫ ଓ ପସମାନ୍ଦା ମୁସଲିମ ସମୁଦାୟ ମଧ୍ୟରେ ସମନ୍ୱୟ ସୃଷ୍ଟି କରି ନିଜର ରାଜନୈତିକ ପରିସୀମା ବଢ଼ାଇବାକୁ ଚାହୁଁଛି। ପଶ୍ଚିମ ୟୁପିରେ ମୁସଲିମ ଭୋଟ ଅନେକ ଆସନରେ ନିର୍ଣ୍ଣାୟକ ଭୂମିକା ନେଇଥାଏ।
